- భైరి నరేష్ రిమాండ్ రిపోర్టులో కీలక అంశాలు.
- కావాలనే వ్యాఖ్యలు చేశానని ఒప్పుకున్న నరేష్.
- అయ్యప్పస్వామిపై వ్యాఖ్యలు తప్పేనంటూ వివరణ.
అయ్యప్పస్వామి పుట్టుకను కించపరుస్తూ హిందూ దేవుళ్లు, దేవతలపై అసభ్యకర వ్యాఖ్యలు చేసిన ఓయూ స్టూడెంట్, భారత నాస్తిక సమాజం తెలంగాణ అధ్యక్షుడు భైరి నరేష్ వ్యవహారం తెలుగు రాష్ట్రాల్లో ప్రకంపనలు సృష్టిస్తోంది. ఇప్పటికే అతడిపై పోలీసులు కేసులు నమోదు చేసి జైలుకు తరలించారు. తాజాగా భైరి నరేష్ రిమాండ్ రిపోర్ట్ బయటకు వచ్చింది. ఈ రిమాండ్ రిపోర్టులో కీలక అంశాలు వెలుగులోకి వచ్చాయి.
తాను చేసిన నేరాన్ని భైరి నరేష్ పోలీసుల ముందు ఒప్పుకున్నాడు. ఉద్దేశపూర్వకంగానే అయ్యప్పస్వామిపై వ్యాఖ్యలు చేశానని, అలా హిందూవుల మనోభావాలను దెబ్బతీసేలా దారుణమైన వ్యాఖ్యలు చేయడం తప్పేనని నేరాన్ని ఒప్పుకున్నాడు. కావాలనే అలా వ్యాఖ్యలు చేశానని విచారణలో పోలీసులుకు భైరి నరేష్ తెలిపినట్లు ఈ రిమాండ్ రిపోర్టులో ఉంది. నలుగురు ప్రత్యక్ష సాక్షుల నుంచి పోలీసులు స్టేట్‌మెంట్ తీసుకున్నారు. ఉదేశపూర్వకంగానే బైరి నరేష్‌ను కార్యక్రమానికి పిలిచినట్టు హనుమంతు అనే వ్యక్తి ఇచ్చిన స్టేట్‌మెంట్‌ను పోలీసులు రికార్డ్ చేశారు.
నలుగురు ప్రత్యక్ష సాక్షులు కూడా ఉద్దేశపూర్వకంగానే భైరి నరేష్ వ్యాఖ్యలు చేసినట్లు స్టేట్‌మెంట్ ఇచ్చారు. డిసెంబర్ 19న కొడంగల్‌లో జరిగిన అంబేద్కర్ విగ్రహ ఆవిష్కరణ సభలో అయ్యప్ప స్వామి జననంపై భైరి నరేష్ అసభ్యకర వాఖ్యలు చేశారు. ఆ వ్యాఖ్యల వీడియోలు సోషల్ మీడియాలో వైరల్‌గా మారడంతో అయ్యప్ప మాలాధారులు, హిందూ సంఘాలు సీరియస్‌గా తీసుకున్నాయి. భైరి నరేష్‌ను అరెస్ట్ చేసి పీడీ యాక్ట్ చట్టం కింద కేసు నమోదు చేయాలని రాష్ట్రవ్యాప్తంగా అయ్యప్ప స్వాములు ఆందోళనలకు దిగడంతో ఉద్రిక్త పరిస్థితులు నెలకొన్నాయి. రాష్ట్రవ్యాప్తంగా పలు పోలీస్ స్టేషన్లలో భైరి నరేష్‌పై కేసులు నమోదయ్యాయి.
ఇతర రాష్ట్రాల్లో కూడా భైరి నరేష్‌పై కేసులు నమోదయ్యాయి. మొత్తం 200 కేసులు భైరి నరేష్‌పై నమోదు కావడంతో.. అతడిని సోషల్ మీడియా ద్వారా ట్రేస్ చేసి పోలీసులు అరెస్ట్ చేశారు. వివాదాస్పద వ్యాఖ్యలు చేసినందుకు గతంలోనూ భైరి నరేష్‌పై అనేక కేసులు నమోదైనట్లు పోలీసులు గుర్తించారు. హనుమకొండలో రెండు కేసులు, నవాబ్‌పేట పోలీస్ స్టేషన్లలో కేసులు నమోదయ్యాయి. ఉద్దేశపూర్వకంగానే మతాల మధ్య చిచ్చు పెట్టేందుకు భైరి నరేష్ వ్యాఖ్యలు చేసినట్లు విచారణలో పోలీసులు గుర్తించారు. ప్రస్తుతం వికారాబాద్ జిల్లా పరిగి సబ్ జైలులో భైరి నరేష్ ఉన్నాడు. సబ్ జైలుకు తరలించే సమయంలో అయ్యప్పస్వామి భక్తులు అతడిని అడ్డుకునే ప్రయత్నం చేశారు. వారిని చూసి భైరి నరేష్ జైలు లోపలికి పరిగెత్తాడు. జైలు వద్ద కొద్దిసేపు ఉద్రికత్త పరిస్థితులు చోటుచేసుకున్నాయి.
Source :- SAMAYAM TELUGU
